Feijóo ve a "mesma" postura do PP en "toda España" sobre caixas

  O presidente da Xunta, Alberto Núñez Feijóo, asegurou este xoves que o PP ten "a mesma formulación" sobre o sistema financeiro "en toda España" e, fronte ás voces que denuncian contradicións entre a súa postura e o documento sobre caixas que presentou onte o PP nacional ao Goberno central, chamou a "non caer na trampa" de "xustificar" a quen busca "vetar" a fusión de Caixa Galicia e Caixanova con "ruído e confusión".

   "Os que queren introducir confusións e ruído só buscan vetar a fusión", recalcou na rolda de prensa posterior ao Consello da Xunta, na que insistiu en que o único que quere o seu partido é "que a normativa afecte a todos por igual". Con todo, advertiu que o "problema" de Galicia é o "presente" e non as "propostas de futuro" do PP, que defende eliminar o veto autonómico e crear "un novo tipo de caixas de ámbito nacional".

   "O PPdeG e o presidente da Xunta só responden ante os intereses de Galicia, o meu equipo é Galicia", replicou Feijóo, antes de resaltar que a Xunta ten "moi claro" que quere a fusión entre Caixa Galicia e Caixanova. Así, indicou que, no actual modelo de caixas, as comunidades "teñen as súas competencias" e que é o Goberno a quen corresponde "ver e analizar" outras "propostas de futuro", como a que presentou onte o PP.

   Neste escenario, Feijóo advertiu de que o "problema real" que existe "no presente" é o "veto" á Lei de Caixas galega e a unha fusión que, recordou, apoia a Xunta, o PPdeG, o BNG, os sindicatos e a patronal na comunidade. "O problema de Galicia non é o futuro, é o presente; e estase a converter isto nunha cuestión grave de irresponsabilidade", denunciou.

   De feito, o máximo mandatario autonómico reprobou que haxa dirixentes políticos galegos --en clara referencia ao líder do PSdeG, Manuel Vázquez-- que "acudan a Madrid" para "boicotear" o futuro financeiro de Galicia e ver "como prexudican mellor" a comunidade, mentres o Goberno central mantén "paralizadas" as negociacións sobre a Lei de Caixas.

"INSULTAR" A GALICIA

   Na liña, Alberto Núñez Feijóo lamentou que "algún responsable" do Executivo estatal "non teña tempo para negociar" a Lei de Caixas de Galicia "en días laborais", pero si para "intentar reducir" a súa capacidade financeira "en mitins" e insultar a comunidade "en festivos e fins de semana".

   "Sería moi bo abandonar a técnica de vetar e impedir que Galicia teña caixas", aconsellou, antes de puntualizar que "as únicas propostas" que existen na mesa de negociación da Lei de Caixas son as que presentou a Xunta. "O Goberno central tenas sobre a mesa dende hai semanas, son as propostas que dita o sentido común e o respecto pola lei", engadiu.

   En canto aos cinco puntos da normativa nos que non hai acordo, Feijóo ratificouse na súa postura de que a Xunta está disposta a "modificar" a súa redacción, pero insistiu en que as "competencias exclusivas" que a comunidade ten sobre as caixas "se teñen que respectar". "É moi difícil negociar con quen non quere", lamentou.

   Malia as "dificultades" para seguir a negociación, anunciou que "non tirará a toalla" e que traballará "ata o final" posto que non está disposto "a ser cómplice" de que Galicia quede sen caixas". "Sentemos para seguir falando e analizar que é o que nos separa", propuxo o xefe do Executivo.

MODIFICACIÓN DOS ÓRGANOS DE GOBERNO

   Por outra banda, Núñez Feijóo pronunciouse sobre o informe xurídico encargado pola Consellería de Facenda para avaliar a situación dos membros dos órganos de goberno das caixas tras a publicación no Boletín Oficial do Estado (BOE) o pasado sábado da admisión a trámite do recurso de inconstitucionalidade da Lei de Caixas galega.

   Este trámite suspende a todos os efectos os preceptos impugnados, entre os que atopa o que se refire á renovación das cúpulas, pero non o que establece as novas incompatibilidades e límites de idade para formar parte das asembleas xerais ou consellos de administración das caixas.

   "A Asesoría Xurídica está a analizar como se aplica a lei", sinalou Núñez Feijóo, quen destacou que iso é o que toca un Goberno que "cre" na lei e no Estado do Dereito. "Supoño que non seremos culpables do recurso e que non se imputará á Xunta os efectos da súa aplicación", concluíu.