Salgado afirma que os cargos electos "non deben estar" nos órganos de xestión das caixas

A vicepresidenta económica do goberno, Elena Salgado, mostrouse este xoves de acordo coa idea do PP de que os cargos electos "non deben estar nos órganos de xestión das caixas de aforro" e mesmo recordou que varias comunidades autónomas, como Cataluña, non os fan partícipes da xestión das entidades, porque "non o consideran razoables".

   Durante a súa segunda quenda de intervención ante a Comisión de Economía e Facenda do Congreso, Salgado sinalou que esta é a única coincidencia que manteñen cos 'populares' para a reestruturación do sector bancario.

   En calquera caso, incidiu en que o marco institucional do sector financeiro nestes momentos é sólido e "non ten sentido" modificalo nestes momentos para alterar o proceso de reestruturación en marcha.

   Non obstante, sinalou que a reforma que emprenderá o Goberno da Lei de Órganos de Representación das Caixas de Aforro (LORCA) será "respectuosa co bloque constitucional" e a "estrutura territorial".

   En calquera caso, non se iniciará antes de xuño, cando o Executivo estatal prevé que se completara a reordenación grazas á intervención do Fondo de Reestruturación ordenada Bancaria (FROB).

BNG, EN CONTRA DE "EXPROPIAR" OS AFORROS GALEGOS

   Pola súa banda, o representante do BNG, Francisco Jorquera, acusou o Goberno de facer un recurso 'ad hoc' para impedir unha fusión das tres caixas galegas e forzar que se fusionen con entidades doutras rexións. "Noutras palabras: queren expropiar os aforros dos galegos e levarllos a outras rexións", asegurou.

   Para o deputado nacionalista, a "resposta do que está a suceder coas caixas" obtívose onte, cando o "Goberno central e o PP estatal escenificaron un acordo" para que Galicia quede sen caixas de aforro, "restrinxindo" as competencias da Xunta e favorecendo fusións que conduzan a "grandes caixas españolas e avanzar na súa privatización".

   "En definitiva, PP e PSOE están de acordo en impedir que Galicia dispoña de institucións financeiras propias que contribúan ao desenvolvemento da nosa comunidade e expatriar o aforro dos galegos a outras partes do Estado", concluíu o parlamentario do Bloque, quen censurou a actitude "chulesca e ausente dun mínimo de respecto institucional co que o Goberno central está a tratar a Galicia".

   Pola súa parte, o voceiro económico do PP, Cristóbal Montoro, recriminou a Salgado que, en lugar de aplicar reformas para impulsar o devandito proceso, "só impugnara" a Lei de Caixas galega. "Ese non é o camiño", incidiu o dirixente 'popular'.

CULPA A FEIJÓO DOS DESENCONTROS

   Salgado reiterou que o Goberno retirará o recurso se o Executivo galego elimina os puntos da normativa galega de caixas --aprobada polo Parlamento autonómico cos votos do PPdeG e BNG-- e que o Goberno considera contrarios á Lei de Órganos de Representación das Caixas de Aforro (LORCA) e ao "bloque constitucional", tras o que asegurou que esa é a dirección "na que se está a traballar".

   Así mesmo, culpou da marcha das negociacións á Xunta e recordou que esta formulou revisar a lei para que se axustase á existente en Andalucía, pero cando o Goberno aceptou esta posibilidade --segundo Salgado a través do vicepresidente terceiro, Manuel Chaves-- o Executivo de Alberto Núñez Feijóo retractouse.