A venda de vivendas caeu un 19,4% en Galicia en 2009

A venda de vivendas reduciuse un 19,4% en Galicia en 2009, en relación co ano anterior, e alcanzáronse as 23.832 operacións. Deste modo, a comunidade galega caeu por enriba da media estatal (18%), malia que a compravenda foi repuntando dende o segundo trimestre do ano e creceu un 1,97% nos últimos tres meses, segundo os datos difundidos hoxe polo Ministerio de Vivienda.

   En toda España, a venda de vivendas caeu un 18% en 2009, ata totalizar 462.747 operacións, sumando así o seu terceiro ano en negativo e o segundo peor da serie, iniciada en 2005. Do total de vendas efectuadas o ano pasado, 240.837 transaccións corresponderon a vivendas de obra nova e 221.910 a inmobles de segunda man, con descensos do 27,8% e do 4%, respectivamente.

   Non obstante, malia a caída anual, o cuarto trimestre de 2009 supuxo un respiro para os vendedores de pisos, xa que as transaccións de vivendas aumentaron un 4,1% entre outubro e decembro en relación a igual período de 2008, ata rexistrar 130.572 operacións.

   En Galicia, as cifras foron en continuo descenso ata o segundo trimestre de 2009, canto repuntaron e rexistraron un incremento intertrimestral do 10,47%. Nos últimos tres meses as operacións ascenderon a 6.270.

   Do total de transaccións inmobiliarias realizadas en Galicia en 2009, 15.258 corresponderon a vivenda nova, que rexistrou un descenso do 22,39%. Pola súa banda, as vendas de vivenda usada ascenderon a 8.574 o ano pasado, o que representa unha caída máis contida, do 13,5%.

DATOS ESTATAIS

   O do cuarto trimestre de 2009 foi o primeiro incremento interanual experimentado pola venda de vivendas en tres anos (dende o cuarto trimestre de 2006 non se rexistrara ningún), segundo destacou o Departamento dirixido por Beatriz Corredor.

   Ademais, se se comparan as vendas do cuarto trimestre coas do terceiro, obsérvase un crecemento trimestral nas transaccións de vivenda do 21,4%.

   Por primeira vez en nove trimestres, entre outubro e decembro de 2009 vendéronse máis vivendas de segunda man que de obra nova. En concreto, das 130.572 transaccións realizadas neste período, 62.278 eran de obra nova, un 16,9% menos que en igual período de 2008, en tanto que 68.294 eran de segunda man, cun crecemento do 36,5% en taxa interanual.

   Pola súa banda, o número de vivendas compradas polos residentes estranxeiros en España ascendeu a 7.340 no cuarto trimestre de 2009, o que supón un 5,7% das vivendas adquiridas pola totalidade dos residentes e un 21% máis respecto ao trimestre anterior. En canto ao colectivo de non residentes, o número de vivendas compradas por este foi de 725.

MADRID, A ÚNICA ONDE AUMENTAN AS VENDAS.

   Por comunidades autónomas, catro delas concentraron o 58% do total das vivendas vendidas no cuarto trimestre do ano pasado: Andalucía (24.052), Madrid (17.968), Cataluña (17.030) e Comunidad Valenciana (16.807).

   No último ano rexistráronse descensos na venda de vivendas en todas as comunidades autónomas, salvo en Madrid, onde aumentou un 2%. Con caídas de vendas superiores á media nacional figuran Castilla-La Mancha (-31,9%), Canarias (-29,3%), Asturias (-24,5%), Baleares (-23,8%), Andalucía (-22,9%), Comunidade Valenciana (-22,7%), Murcia (-21,8%), Galicia (-19,4%), Extremadura (-19,2%) e Castilla e León (-18,7%).

   Por debaixo da media nacional situáronse País Vasco (-17,2%), La Rioja (-14,6%), Cantabria (-10,5%), Aragón (-10,4%), Cataluña (-8,7%), Ceuta e Melilla (-7,3%) e Navarra (-1,8%).

MUNICIPIOS

   Así mesmo, as capitais de provincia nas que se rexistrou un maior número de transaccións inmobiliarias no último ano foron Madrid (24.779), Barcelona (9.631), Zaragoza (6.895), Murcia (5.688), Valencia (5.610), Sevilla (5.224) e Málaga (4.763).

   Respecta aos municipios que non son capital de provincia, o maior número de vendas produciuse en Alcorcón (2.772), Torrevieja (2.570), Cartagena (2.303), Orihuela (2.300), Gijón (2.276) e Alcobendas (2.269).